Infosite mat Traileren a Biller
Et kléngt wéi e Geniestreich: am éischte Film wou ee selwer Regie féiert spillt een d'Haaptroll déi vun Sex a Porno besiess ass, an et cast een d'Scarlett Johansson als weiblech Haaptroll - genee daat huet sëch den Joseph Gordon-Lewitt och geduet an "Don Jon" réaliséiert. Entstaanen ass en zimmlech gelongen, wann och phaseweis relativ vulgäre Film mat vill Witz an enger interessanter Struktur. Den Trailer weist engem perfekt waat fier e Macho eisen Haaptprotagonist ass:
Wéi ee gesäit kann een sëch op vill Alkohol, Party, Sex a Porno astellen, mee keng Angscht: alles bleiwt a Grenzen an de Film fënnt eng gudd Balance tëscht "net ze vulgär awer baal" an "ok, daat war lo wierklech déck witzeg!". Zur Story gëtt et net vill ze sooen: se ass recht banal awer net direkt vun Ufank un ultra-offensichtlech, se ass gudd mat Witzer gefëllt (och eng gudd Rëtsch Running-Gags) an mat enger Längt vun 90 Minuten och net ze laang. Waat bei dësem Film vill méi rausstëcht ass den Opbau an de Schnëtt, an ech mengen dass och nët-Film-Studenten dëst wert opfaalen!
Ech hun lo grad kuerz erwähnt dass de Film vill Running-Gags huet, an passend dozou och Szenen déi ëmmer an ëmmer rëm kommen, an engem sou op eng ganz speziell Art a Weis en zimmlech exakt Zeitgefill verschaafen. Ee Beispill dofier wier dass heen an seng Famill all Sonnden an d'Kierch gin an dass d'Art a Weis wéi heen (den Jon) an d'Kierch kënnt ALL Sonnden d'nemlescht gespillt a gefilmt ass, sou dass een ab engem bestëmmte Punkt laache muss soubaal een de Kierchentuerm gesäit, well ee ganz genau weess waat fier eng Szene elo komme wert. Obwuel daat absolut iwwerflësseg an wéi en No-Go kléngt, gëtt et dem Film eng immens Dynamik, waat doru läit dass et am Film e ganze Koup sou Szenen gin.
Ab engem bestëmmte Punkt gëtt dëst ausgenotzt fier onnéideg Minuten ze iwwersprangen andeems een nëmmen ganz kuerz e charakteristescht Geräisch/Bild vun enger Aktioun matkritt. Mer perséinlech huet daat zimmlech gudd gefall, ech hun daat op alle Fall léiwer wéi déi berühmt Zeitspréng wou dann ënnen am Bild zum Beispill "X months later" steht. Waat mëch awer och nach iwwerrascht huet ass wéi "geschmeideg" de Film d'Thema behandelt, ouni dobäi domm a geschmacklos ze gin, an daat obwuel insgesamt iwwert déi ganz Filmlängt op mannst 5 Minuten Porno-Biller gewisse gin.
"Don Jon" ass e recht gelongenen éischte Film vum Monsieur Gordon-Lewitt, mat enger akzeptabeler Story, guddem Humor an enger interessanter Art a Weis d'Geschicht ze erzielen. Trotzdem ass nach kee Meeschter vum Himmel gefall, an sou si vill Saachen dran déi een besser/aanescht hätt kënne maachen. Eppes steht awer fest: dëse Film wert nach soubaal kee Nofolger fannen, an daat ass och mengen ech besser sou, well et ass definitiv NET daat waat een am Kino gewinnt ass! Ech gin dem Film 6.9/10 op der berühmter Ulmerich-Skala an dobäi kritt en nach den "DAAT hun ech nach net erliewt"-Award dofier dass an de Credit ganz grouss d'Symbol vu "PornHub" optaucht!
bis dohin,
stay tuned.
Keine Kommentare:
Kommentar veröffentlichen